النهارده كان يوم عادي قوي
مفيهوش اي حاجه تخليه يوم وحش ولا اي حاجه تخليه يوم حلو
بس وانا راجعة لقيت نفسي بقول
الحمد لله ياربنا انك خليتني مبسوطة النهارده
والحقيقي إني من ساعة ماقلت الكلمة دي وأنا بفكر فيها
ليه؟
الفترة اللي فاتت كانت فترة صعبة شوية بالنسبة لي
ويمكن الفترة دي لسة ماعدتش بس إن شاء الله هتعدي على خير
الفكرة بقى
إن اليوم ده حسيت إنه جالي علشان يوصل لي رسالة معينة من ربنا
إيه الرسالة دي؟
إن ببساطة شديدة
كل حاجة في إيد ربنا
وإن ربنا مسبب الأسباب ومش محتاج أسباب
امممممم
طيب ياستي مااحنا عارفين ان ربنا مسبب الأسباب مخترعتيش حاجه جديدة يعني
تؤتؤتؤتؤ
ليييييييييييييه بس كدة؟وأنا اللي بقول بقينا أصحاب وهنحكي مع بعض ونفكر!
على العموم بص فوق كده ..ايوه يمين سنه.. كمان شويه بقى... ايوووووووه في ذرار مرسوم عليه اكس اضغط عليه وريح نفسك J
.
.
.
إية ده إنت لسه معانا؟!!!!!
طيب ياسيدي شكرا
نكمل بقى
.
.
فكرة إن ربنا مسبب الأسباب إحنا كلنا عارفينها ومقتنعين بيها بس بحس إن أنا عن نفسي بقتنع فيها في حاجة زي الموت مثلا ..الشغل
حاجة كده يعني
بس النهاردة.. لا
النهاردة إكتشفت إني كنت قليلة الذوق جدا مع ربنا طول حياتي
يعني أنا لما بتضايق بسبب حد معين..كنت بحس إن هو اللي خلاني مضايقة
ولو فرحت بسبب حد معين كنت بحس إن هو اللي فرحني
مع إن في الحالتين هما كانوا مجرد أسباب
فرق ممكن ميبقاش واضح
إو ناس تفتكرة مش مهم
بس حقيقي أنا حاسه إنه فرق خطير جدا في علاقتنا مع ربنا
وتأثيرة في حياتنا وفي نظرتنا للأمور أكثر عمقا مما قد نتخيل
كنت بصب غضبي من المسبب في السبب
ودي قلة أدب
أو كنت بوجة شكري للسبب بدل من المسبب
ودة جحود
يارب أقدر أخزن المفهوم ده عندي وأتعامل بيه في حياتي
بس
في حالة إن كان اللي وصلت له ده صح
لأني مش عارفة إذا كان صح والا غلط.
تصدقى أأأأه يا شيماء
ReplyDeleteأنا كمان عمرىما فكرت فيها كده
بس انتى كده صح
:)
حسيت المرة دي بالذات إن الأسلوب سلس وسهل جداً
ReplyDeleteوفي نفس الوقت يحمل معنى عميق
بطريقة تخليه قريب أوي ل presentation
أعتقد لو اتعمل presentation هيكون تحفة بإذن الله
:)
شيماء:
ReplyDeleteانا كمان عمري مافكرت فيها قبل كده
:)
طارق:
شكرا ياطارق على رايك
ويمكن يتعمل بريسنتيشن مره
مين عارف
:)